ಅತ್ಯಾಧುನಿಕ ತಂತ್ರಜ್ಞಾನದ ಸಮಗ್ರ ಸ್ಟುಡಿಯೋ ‘ದಿ ಮೀಡಿಯಾ ಹೌಸ್’ ಆರಂಭ
ಕರ್ನಾಟಕದಲ್ಲೇ ಮೊದಲ ಬಾರಿಗೆ ಸಿನಿಮಾ ನಿರ್ಮಾಣ ಮತ್ತು ಪೋಸ್ಟ್ ಪ್ರೊಡಕ್ಷನ್‌ನ ವಿವಿಧ ವಿಭಾಗಗಳಿಗೆ ಸಂಬಂಧಿಸಿದ ಅತ್ಯಾಧುನಿಕ ತಂತ್ರಜ್ಞಾನದ ಸಮಗ್ರ ಸ್ಟುಡಿಯೋ ಶೇಷಾದ್ರಿಪುರಂನಲ್ಲಿ ‘ದಿ ಮೀಡಿಯಾ ಹೌಸ್’ ಇತ್ತೀಚೆಗೆ ಉದ್ಘಾಟನೆಗೊಂಡಿತು.
ದೊಡ್ಡ ಬಜೆಟ್ ಸಿನಿಮಾಗಳಿಂದ ಕಿರುಚಿತ್ರಗಳವರೆಗೆ, ವೆಬ್ ಸಿರೀಸ್‌ನಿಂದ ಜಾಹೀರಾತು ಚಿತ್ರಗಳವರೆಗೆ ಎಲ್ಲ ರೀತಿಯ ಸಿನಿಮಾ ಮತ್ತು ಮೀಡಿಯಾ ಪ್ರಾಜೆಕ್ಟ್‌ಗಳಿಗೆ ಅಗತ್ಯವಿರುವ ಸೌಲಭ್ಯಗಳನ್ನು ಒಂದೇ ಸೂರಿನಡಿ ಕಲ್ಪಿಸಿರುವುದು ಈ ಸ್ಟುಡಿಯೋದ ವಿಶೇಷತೆ. ಇಂತಹ ಸಮಗ್ರ ತಾಂತ್ರಿಕ ಸೌಲಭ್ಯಗಳಿಗಾಗಿ ಈ ಹಿಂದೆ ಚೆನ್ನೈ ಅಥವಾ ಹೈದರಾಬಾದ್‌ಗೆ ತೆರಳಬೇಕಾದ ಪರಿಸ್ಥಿತಿಯಿತ್ತು. ಕನ್ನಡ ಚಿತ್ರರಂಗದ ನಿರ್ಮಾಪಕರು, ನಿರ್ದೇಶಕರು ಹಾಗೂ ತಂತ್ರಜ್ಞರಿಗೆ ಕರ್ನಾಟಕದಲ್ಲೇ ವಿಶ್ವಮಟ್ಟದ ಸೌಲಭ್ಯಗಳು ದೊರೆಯಬೇಕು ಎಂಬ ಉದ್ದೇಶದಿಂದ ಈ ಸ್ಟುಡಿಯೋವನ್ನು ರೂಪಿಸಲಾಗಿದೆ.
*ಸ್ಟುಡಿಯೋದ ಪ್ರಮುಖ ಆಕರ್ಷಣೆಗಳು* :
– ಫಿಲ್ಮ್ ಎಡಿಟಿಂಗ್: ಸಿನಿಮಾಗಳು, ಪ್ರೋಮೋಗಳು, ಟ್ರೇಲರ್‌ಗಳು, ಮೆಗಾ ಸೀರಿಯಲ್‌ಗಳು, ವೆಬ್ ಸಿರೀಸ್, ಕಿರುಚಿತ್ರಗಳು, ಸಾಕ್ಷ್ಯಚಿತ್ರಗಳು, ಜೀವನಚರಿತ್ರೆ, ಕಾರ್ಪೊರೇಟ್, ಶೈಕ್ಷಣಿಕ ಹಾಗೂ ಜಾಹೀರಾತು ಚಿತ್ರಗಳ ಎಡಿಟಿಂಗ್.
– ಡಬ್ಬಿಂಗ್ ಮತ್ತು ಆಡಿಯೋ ರೆಕಾರ್ಡಿಂಗ್: ವಾಯ್ಸ್ ರೆಕಾರ್ಡಿಂಗ್, ಹಾಡುಗಳ ರೆಕಾರ್ಡಿಂಗ್, ರೀ-ರೆಕಾರ್ಡಿಂಗ್, ಸೌಂಡ್ ಎಫೆಕ್ಟ್ಸ್ ಹಾಗೂ 7.1, 5.1, 2.0, ಮೊನೊ ಮತ್ತು 9.1.6 ಡಾಲ್ಬಿ ಆಡಿಯೋ ಮಿಕ್ಸಿಂಗ್.
– ಡಿಜಿಟಲ್ ಇಂಟರ್ಮೀಡಿಯೇಟ್: ಕಾನ್ಫಾರ್ಮಿಂಗ್, ಕಲರ್ ಗ್ರೇಡಿಂಗ್ ಮತ್ತು ಆಪ್ಟಿಕಲ್ ಎಫೆಕ್ಟ್ಸ್.
– ಪಬ್ಲಿಸಿಟಿ ಡಿಸೈನ್ಸ್: ಪೋಸ್ಟರ್ ವಿನ್ಯಾಸ, ಟೈಟಲ್ಸ್ ಮತ್ತು ಮೋಷನ್ ಗ್ರಾಫಿಕ್ಸ್.
– ಗ್ರೀನ್ ಮ್ಯಾಟ್ ಸ್ಟುಡಿಯೋ: 2,000 ಚದರ ಅಡಿ ವಿಸ್ತೀರ್ಣದ ಗ್ರೀನ್ ಮ್ಯಾಟ್ ಹಾಗೂ ಕ್ರೋಮಾ ಕೀ ಸೌಲಭ್ಯ.
– ಎಐ ಫಿಲ್ಮ್ ಸ್ಟುಡಿಯೋ: ಎಐ ಡಬ್ಬಿಂಗ್, ವಾಯ್ಸ್ ಓವರ್ ಮತ್ತು ಎಐ ವಿಷುವಲ್ ಎಫೆಕ್ಟ್ಸ್.
– ಆಧುನಿಕ ಚಿತ್ರೀಕರಣ ವ್ಯವಸ್ಥೆ: ಎಲ್‌ಇಡಿ ವಾಲ್ ಸೇರಿದಂತೆ ವಿವಿಧ ಸ್ಪೆಷಲ್ ಎಫೆಕ್ಟ್ಸ್ ಹಾಗೂ ವಿಭಿನ್ನ ದೃಶ್ಯಗಳನ್ನು ರೂಪಿಸಲು ಅಗತ್ಯವಿರುವ ಅತ್ಯಾಧುನಿಕ ತಾಂತ್ರಿಕ ಸೌಲಭ್ಯಗಳು.
ಇಂದಿನ ಓಟಿಟಿ ಯುಗಕ್ಕೆ ಅನುಗುಣವಾಗಿ ನೆಟ್‌ಫ್ಲಿಕ್ಸ್, ಅಮೆಜಾನ್ ಪ್ರೈಮ್ ವಿಡಿಯೋ, ಜೀ5 ಸೇರಿದಂತೆ ವಿವಿಧ ಓಟಿಟಿ ವೇದಿಕೆಗಳಿಗೆ ಅಗತ್ಯವಿರುವ ಸಿನಿಮಾ ಮತ್ತು ಮೀಡಿಯಾ ಪ್ರಾಜೆಕ್ಟ್‌ಗಳ ನಿರ್ಮಾಣಕ್ಕೂ ಪೂರಕವಾದ ವ್ಯವಸ್ಥೆ ಇಲ್ಲಿದೆ. ಎಐ ತಂತ್ರಜ್ಞಾನದ ಬಳಕೆಯ ಮೂಲಕ ಹೊಸ ರೀತಿಯ ದೃಶ್ಯಗಳು ಮತ್ತು ಕಂಟೆಂಟ್ ರೂಪಿಸಲು ಅವಕಾಶ ಕಲ್ಪಿಸಲಾಗಿದೆ.
ಇದರೊಂದಿಗೆ ನಿರ್ದೇಶಕರು, ಬರಹಗಾರರು, ನಟ-ನಟಿಯರು ಹಾಗೂ ಚಿತ್ರರಂಗದ ವಿವಿಧ ವಿಭಾಗಗಳ ಕಲಾವಿದರು ಮತ್ತು ತಂತ್ರಜ್ಞರು ಒಂದೆಡೆ ಸೇರಿ ಕಥೆ, ಚಿತ್ರಕಥೆ ಹಾಗೂ ಸಿನಿಮಾ ನಿರ್ಮಾಣದ ಕುರಿತು ಚರ್ಚಿಸಲು ಅನುಕೂಲವಾಗುವಂತೆ ವಿಶಾಲವಾದ ಪ್ರತ್ಯೇಕ ಸ್ಥಳವನ್ನೂ ಸಿದ್ಧಪಡಿಸಲಾಗಿದೆ. ಸೃಜನಾತ್ಮಕ ಚರ್ಚೆಗಳು ಮತ್ತು ಸಿನಿಮಾ ಯೋಜನೆಗಳ ರೂಪುರೇಷೆ ಸಿದ್ಧಪಡಿಸಲು ಇದು ಸಹಕಾರಿಯಾಗಲಿದೆ.
ಸ್ಟುಡಿಯೋದಲ್ಲಿ ಹಲವು ವರ್ಷಗಳ ಅನುಭವ ಹೊಂದಿರುವ ನುರಿತ ತಂತ್ರಜ್ಞರು ಕಾರ್ಯನಿರ್ವಹಿಸುತ್ತಿದ್ದು, ಪ್ರತಿಯೊಂದು ವಿಭಾಗದಲ್ಲೂ ಗುಣಮಟ್ಟದ ತಾಂತ್ರಿಕ ಸೇವೆ ಒದಗಿಸಲು ವ್ಯವಸ್ಥೆ ಮಾಡಲಾಗಿದೆ.
ಉದ್ಘಾಟನಾ ಸಮಾರಂಭದ ಬಳಿಕ ಸ್ಟುಡಿಯೋದ ರೂವಾರಿಗಳಾದ ಸ್ಕೈಲೈನ್‌ನ ದಿಲೀಪ್, ಪ್ರತಾಪ್ ಶೆಟ್ಟಿ ಹಾಗೂ ಶ್ರೀಕಾಂತ್ ಅವರು ಸ್ಟುಡಿಯೋದ ಪರಿಕಲ್ಪನೆ, ವಿಶೇಷತೆಗಳು ಮತ್ತು ಇಲ್ಲಿರುವ ಅತ್ಯಾಧುನಿಕ ತಾಂತ್ರಿಕ ಸೌಲಭ್ಯಗಳ ಕುರಿತು ಮಾಹಿತಿ ನೀಡಿದರು. ಸಿರಿ ಮ್ಯೂಸಿಕ್‌ನ ಸುರೇಶ್ ಚಿಕ್ಕಣ್ಣ ಅವರು ಉಪಸ್ಥಿತರಿದ್ದರು.
ಕನ್ನಡ ಚಿತ್ರರಂಗದ ತಾಂತ್ರಿಕ ಬೆಳವಣಿಗೆಗೆ ಪೂರಕವಾಗಿ, ಸಿನಿಮಾ ನಿರ್ಮಾಣದ ವಿವಿಧ ಹಂತಗಳಿಗೆ ಒಂದೇ ಸೂರಿನಡಿ ಸಮಗ್ರ ಸೌಲಭ್ಯ ಒದಗಿಸುವ ‘ದಿ ಮೀಡಿಯಾ ಹೌಸ್’ ಚಿತ್ರರಂಗದವರಿಗೆ ಹೊಸ ಸಾಧ್ಯತೆಗಳನ್ನು ತೆರೆದಿಡುವ ಪ್ರಮುಖ ವೇದಿಕೆಯಾಗುವ ನಿರೀಕ್ಷೆಯಿದೆ.
