ವಿರಾಟ್ ಈಗ ‘ಹರ್ಕ್ಯುಲಸ್’
Chat GPT ಜೊತೆ ಕೊಲಾಬ್ರೇಶನ್ ಅದ ಮೊದಲ ಕನ್ನಡ ಚಿತ್ರ “ಹರ್ಕ್ಯುಲಸ್” ನ ಫಸ್ಟ್ ಲುಕ್ ಬಿಡುಗಡೆ… ಲವರ್ ಬಾಯ್ ಇಮೇಜ್ ನಿಂದ ಮಾಸ್ ಹೀರೋ ಆದ ವಿರಾಟ್ !
ಸ್ಯಾಂಡಲ್ ವುಡ್ ನ ಯಂಗ್ ಅಂಡ್ ಆಕ್ಟಿವ್ ಹೀರೋ ವಿರಾಟ್ ಅಭಿನಯದ ಮೂರನೇ ಚಿತ್ರ “ಹರ್ಕ್ಯುಲಸ್”. ಈ ಸಿನಿಮಾದ ಫಸ್ಟ್ ಲುಕ್ ಅದ್ದೂರಿಯಾಗಿ ರಿಲೀಸ್ ಆಗಿದೆ. ವಿಶೇಷವಾಗಿ ಬೆಂಗಳೂರಿನ ಕೋಣನಕುಂಟೆ ಬಳಿ ಇರುವ ಫೋರಂ ಮಾಲ್ ಆವರಣದಲ್ಲಿ ನಾಯಕ ವಿರಾಟ್ ನ ಖಾದರ್ ಲುಕ್ ಇರುವ ಸುಮಾರು 200 ಅಡಿಯ ಬೃಹತ್ ಟೈಟಲ್ ಪೋಸ್ಟರನ್ನು ಮಾಧ್ಯಮದವರ ಸಮ್ಮುಖದಲ್ಲಿ ಬಿಲ್ಡಿಂಗ್ ಮುಂಭಾಗದಲ್ಲಿ ರಿವೀಲ್ ಮಾಡಲಾಯಿತು. ಈಗಾಗಲೇ ಬಾಲಿವುಡ್ ಚಿತ್ರಗಳಲ್ಲಿ ಚಾಟ್ GPT ಯೊಂದಿಗೆ ಹಲವು ಚಿತ್ರಗಳು ಹೊರ ಬಂದಿದೆ. ಮೊದಲ ಬಾರಿಗೆ ಕನ್ನಡದಲ್ಲಿ ಹರ್ಕುಲಸ್ ಚಿತ್ರದ ಜೊತೆ ಕೊಲಾಬರೇಷನ್ ಆಗಿರುವುದು ಮತ್ತೊಂದು ವಿಶೇಷ.
ಬೆಳ್ಳಿ ಪರದೆಯ ಮೇಲೆ “ಕಿಸ್” ಚಿತ್ರದ ಮೂಲಕ ನಾಯಕನಾಗಿ ಎಂಟ್ರಿಕೊಟ್ಟ ಯುವ ನಟ ವಿರಾಟ್ , ಎರಡನೇ ಚಿತ್ರದಲ್ಲಿ “ರಾಯಲ್” ಆಗಿ ಮಿಂಚಿದ್ದು ಈಗ “ಹರ್ಕ್ಯುಲಸ್” ಆಗಿ ಮಾಸ್ ಎಂಟ್ರಿ ಕೊಡುತ್ತಿದ್ದಾರೆ. ಈ ಹರ್ಕ್ಯುಲಸ್ ಚಿತ್ರಕ್ಕೆ ಯುವ ಪ್ರತಿಭೆ ಭಗೀರಥ ಕಥೆ , ಚಿತ್ರಕಥೆ ಬರೆದು ಆಕ್ಷನ್ ಕಟ್ ಹೇಳುತ್ತಿದ್ದಾರೆ. Aahana ಫಿಲಂಸ್ ಮೂಲಕ ಈ ಒಂದು ಚಿತ್ರ ಅದ್ದೂರಿಯಾಗಿ ನಿರ್ಮಾಣವಾಗುತ್ತಿದೆ. ಈ ಚಿತ್ರದ ಫಸ್ಟ್ ಲುಕ್ ಹಾಗೂ ಚಿತ್ರದ ಕುರಿತು ಮಾಹಿತಿಯನ್ನು ನೀಡಲು ಚಿತ್ರತಂಡ ಪತ್ರಿಕಾಗೋಷ್ಠಿಯನ್ನು ಆಯೋಜನೆ ಮಾಡಿತು.
ಈ ಚಿತ್ರದ ನಿರ್ದೇಶಕ ಭಗೀರಥ ಮಾತನಾಡುತ್ತ ‘ಹರ್ಕ್ಯುಲಸ್’ ಎಂದರೆ ಸೈಕಲ್ ಅಲ್ಲ, ಇದು ಒಬ್ಬ ವಾರಿಯರ್ ಹೆಸರು ಎಂದು ಟೈಟಲ್ ಬಗ್ಗೆ ಸ್ಪಷ್ಟನೆ ನೀಡಿದರು. ಇದು ನನ್ನ 12 ವರ್ಷಗಳ ಜರ್ನಿ , ಚಿತ್ರರಂಗದಲ್ಲಿ ಸಹ ನಿರ್ದೇಶಕನಾಗಿ ಹಲವು ಚಿತ್ರಗಳಿಗೆ ಕೆಲಸ ಮಾಡಿದ್ದೇನೆ. ನಿರ್ದೇಶಕ ಶ್ರೀನಿವಾಸರಾಜು ಬಳಿ ಬಹಳಷ್ಟು ಕಲ್ತಿದ್ದೇನೆ. ರೈಟಿಂಗ್ ನನ್ನ ಹವ್ಯಾಸ. ಹಾಗಾಗಿ ವೆಬ್ ಸೀರೀಸ್ ಗಾಗಿ ಅಮೀಬಾ ಎಂಬ ಕಥೆ ಬರೆದಿದ್ದೆ. ಸಿನಿಮಾನೇ ನನ್ನ ಜೀವನ , ಹಾಗಾಗಿ ನನ್ನ ಮೊದಲ ಪ್ರಯತ್ನವಾಗಿ ನಮ್ಮ ಹರ್ಕುಲಸ್ ಚಿತ್ರದ ಫಸ್ಟ್ ಲುಕ್ ಇಂದು ಬಿಡುಗಡೆಯಾಗಿದೆ.
ಕಥೆ ಬಗ್ಗೆ ಹೇಳೋದಾದರೆ ಇದು ಸೋಲನ್ನೇ ಕಾಣದ ವಾರಿಯರ್ ಒಬ್ಬನ ಹೆಸರು. ನಮ್ಮ ಚಿತ್ರದಲ್ಲಿ ನಾಯಕನ ಕ್ಯಾರೆಕ್ಟರ್ ಅದೇ ರೀತಿ ಇರುತ್ತದೆ. ಇದೊಂದು ಆಕ್ಷನ್ ಲವ್ ಕಂಟೆಂಟ್ ಇರುವ ಸಿನಿಮಾ. ಈ ಚಿತ್ರದ ಮೂಲಕ ವಿರಾಟ್ ಅವರನ್ನ ಬೇರೆಯದೇ ರೀತಿಯಲ್ಲಿ ತೋರಿಸಬೇಕೆಂದು ಪ್ರಯತ್ನಿಸುತ್ತಿದ್ದೇವೆ.
ನಮ್ಮ ಚಿತ್ರದಲ್ಲಿ ಬಹಳಷ್ಟು ಪ್ರಮುಖ ಪಿಲ್ಲರ್ ಗಳಿದ್ದಾರೆ. ನಮ್ಮ ಚಿತ್ರಕ್ಕೆ ಕರುಣಾಕರ್ ಛಾಯಾಗ್ರಹಣ ಮಾಡುತ್ತಿದ್ದು, ಹರಿಕೃಷ್ಣ ರವರ ಸುಪುತ್ರ ಆದಿ ಹರಿ ನಮ್ಮ ಚಿತ್ರಕ್ಕೆ ಸಂಗೀತ ನೀಡುತ್ತಿದ್ದಾರೆ. ದೀಪು. ಎಸ್. ಕುಮಾರ್ ಸಂಕಲನ ಇದೆ. ಇನ್ನು ಈ ಚಿತ್ರದ ನಾಯಕಿ ನಮ್ಮ ಕನ್ನಡದವರೇ ಆಗಿದ್ದು , ಸದ್ಯದಲ್ಲೇ ತಿಳಿಸುತ್ತೇವೆ. ನವೆಂಬರ್ ನಲ್ಲಿ ಚಿತ್ರದ ಶೂಟಿಂಗ್ ಆರಂಭಿಸಿ ಮಾರ್ಚ್ ಏಪ್ರಿಲ್ ವೇಳೆಗೆ ಸಿನಿಮಾ ರಿಲೀಸ್ ಮಾಡುವ ಯೋಜನೆ ಹಾಕಿಕೊಂಡಿದ್ದೇವೆ. ಹಂತ ಹಂತವಾಗಿ ಎಲ್ಲಾ ಅಪ್ಡೇಟ್ ಮುಂದಿನ ದಿನಗಳಲ್ಲಿ ನೀಡುತ್ತೇವೆ. ನಮ್ಮ ತಂಡಕ್ಕೆ ನಿಮ್ಮೆಲ್ಲರ ಸಹಕಾರ ಇರಲಿ ಎಂದು ಕೇಳಿಕೊಂಡರು.
ಯುವ ನಟ ವಿರಾಟ್ ಮಾತನಾಡುತ್ತಾ ಇದೊಂದು ಆರ್ಗ್ಯಾನಿಕ್ ಪ್ರಯತ್ನ. ಅಭಿಮಾನಿಗಳು, ಮಾಧ್ಯಮ ಮಿತ್ರರಿಂದ ನಮ್ಮ ಚಿತ್ರದ ಟೈಟಲ್ ಲಾಂಚ್ ಮಾಡಿಸಿದ್ದೇವೆ. ನನ್ನ ಮೂರನೇ ಚಿತ್ರ ಇದಾಗಿದ್ದು, ಹರ್ಕ್ಯುಲಸ್ ಇನ್ನೊಬ್ಬರಿಗೋಸ್ಕರ ಯುದ್ದ ಮಾಡುತ್ತಾನೆ. ಆತನಿಗೆ ಯಾವತ್ತೂ ಸೋಲಿಲ್ಲ. ಆದರೆ ಆತನ ಹೋರಾಟ ಯಾರಿಗೋಸ್ಕರ ಅನ್ನೋದೆ ಕಥೆ. ಡೈರೆಕ್ಟರ್ ಪ್ರತಿ ಸೀನನ್ನು ಅದ್ಭುತವಾಗಿ ರಚಿಸಿದ್ದಾರೆ. ಈ ಚಿತ್ರದಲ್ಲಿ ನನಗೆ ಮೂರು ಶೇಡ್ಗಳು ಇದೆ. ನನ್ನ ಎರಡು ಚಿತ್ರಗಳಲ್ಲಿ ಲವ್ವರ್ ಬಾಯ್ ಆಗಿದೆ , ಈ ಚಿತ್ರದಲ್ಲಿ ಆಕ್ಷನ್ ಕಮ್ ಲವ್ವರ್ ಆಗಿ ಕಾಣಿಸಿಕೊಳ್ಳುತ್ತಿದ್ದೇನೆ. ಈ ಕ್ಯಾರೆಕ್ಟರ್ ಗಾಗಿ ಮಾಡಿಕೊಂಡಿರೋ ಪ್ರಿಪರೇಶನ್ ಕುರಿತು ವಿವರಿಸುತ್ತ ಹರ್ಕ್ಯುಲಸ್ ಗಾಗಿ ನನ್ನ ಗೆಟಪ್ ಸೇರಿದಂತೆ ಬಹಳಷ್ಟು ಬದಲಾವಣೆ ಮಾಡಿಕೊಂಡಿದ್ದೇನೆ. ನನ್ನ ಜೀವ ಬೇಕಾದ್ರೂ ಕೊಡುತ್ತೇನೆ ಎಂದು ಭಾವನಾತ್ಮಕವಾಗಿ ಹೇಳಿದರು.
ಇನ್ನು ಕಿಸ್ ಚಿತ್ರದಲ್ಲಿ ನೀನೆ ಮೊದಲು ಸಾಂಗ್ ಕಂಪೋಜ್ ಮಾಡಿದ್ದ ಆದಿ ಹರಿಕೃಷ್ಣ ಈ ಚಿತ್ರಕ್ಕೆ ಮ್ಯೂಸಿಕ್ ಮಾಡುತ್ತಿದ್ದಾರೆ. ಆದಿ ಸಂಗೀತ ನಿರ್ದೇಶಕ ವಿ. ಹರಿಕೃಷ್ಞ ಅವರ ಪುತ್ರ , ತನ್ನ ಮೊದಲ ಪ್ರಯತ್ನದ ಕುರಿತಂತೆ ಮಾತನಾಡಿದ ಸಂಗೀತ ಸಂಯೋಜಕ ಆದಿ, ನಾನು ಸ್ವತಂತ್ರವಾಗಿ ಮ್ಯೂಸಿಕ್ ಮಾಡುತ್ತಿರುವ ಮೊದಲ ಚಿತ್ರವಿದು. ಕಳೆದ 2 ವಾರದಿಂದ ಈ ಪ್ರೊಮೋಗೆ ಬಿಜಿಎಂ ಮಾಡಿದ್ದೇನೆ. ಈ ಚಿತ್ರಕ್ಕಾಗಿ ವಿಶೇಷ ರೀತಿಯ ಸಾಂಗ್ ಕಂಪೋಸ್ ಮೂಲಕ ಹಾಡುಗಳು ಹೊರ ತರಲು ಶ್ರಮ ಪಡುತ್ತಿದ್ದೇವೆ ಎಂದರು. ವಿದೇಶಿ ಮೂಲದ ನಿರ್ಮಾಪಕ ತಮ್ಮ ಅಹಾನಾ ಫಿಲಂಸ್ ಮೂಲಕ ಈ ಚಿತ್ರ ನಿರ್ಮಾಣ ಮಾಡುತ್ತಿದ್ದಾರೆ. ಗುರುರಾಜ ಎಂ.ದೇಸಾಯಿ ಕ್ರಿಯೇಟಿವ್ ಹೆಡ್ ಆಗಿದ್ದಾರೆ. ಒಂದು ಯುವ ಪಡೆಗಳ ತಂಡ ಸೇರಿ ಆರಂಭಿಸಿರುವ ಈ ಚಿತ್ರದ ಹೆಚ್ಚಿನ ಮಾಹಿತಿ ಮುಂದಿನ ದಿನಗಳಲ್ಲಿ ಸಿಗಲಿದೆ.
